DAVID.GE 2.0 – ქართული მარკეტინგის ბლოგი » iTV

iTV Conference 2

David — Fri, 30 Apr 2010 11:43:37 +0000

iTV Conference

გუშინ იყო iTV კონფერენციის მეორე დღე. როგორც ჩემს წინა პოსტში ვივარაუდე, მეორე დღე კი არა – დამოუკიდებელი კონფერენცია გამოდგა. ჩემს აღმატებით მოსაზრებებს ორგანიზების, დიზაინერული შეფუთვის, კვების და სხვა საკითხებზე აქ აღარ გავიმეორებ – ყველაფერი ისევე კარგად იყო, როგორც პირველ დღეს. პირდაპირ შინაარსზე გადავალ:

მეორე დღის პრეზენტაციები ჩემთვის ბევრად უფრო საინტერესო იყო – როგორც თემის გაშლის, ისე სპიკერების თვალსაზრისით. განრიგში იყო სულ იყო 4 პრეზენტაცია: 3 უცხოური (თემაზე “ყველაფერი კარგადაა”) და 1 ქართული (თემაზე “ყველაფერი ცუდადაა”). ბოლოს კიდევ ბონუსად გველოდა MyVideo.ge-ს ქეისის განხილვა (თემაზე “ჩვენთანაც ყველაფერი კარგადაა”).

Peter Woodford და Stephen Ong წარმოადგენდნენ ბრიტანული ინტერნეტ-სატელევიზიო საიტების ქსელს viewmy.tv, რომელშიც 60-მდე სხვადასხვა საიტია გაერთიანებული. თუ პირველი უფრო ტექნიკური სფეროს სპეციალისტია, მეორე სულ “ჩვენიანი” აღმოჩნდა – ბიზნეს სკოლის კურსდამთვარებული. თან, მისი პრეზენტაცია ინტერნეტ-ტელევიზიის მარკეტინგს და რეკლამას ეხებოდა. ამიტომ, კითხვების დასმის დრო რომ მოვიდა მიკროფონი ხელიდან ვერ გამომართვეს…

მათ გარდა უცხოელი პრეზენტატორი იყო Hemmy Cho – BBC-ის აკადემიის ტრენერი, რომელმაც მიუხედავად შერჩენილი აზიური აქცენტისა, მაინც კარგი პრეზენტაცია გააკეთა. მათ შემდეგ ჯერი ქართული Teen TV-ის პრეზენტაციაზე მიდგა. როგორც ყოველთვის, “საქართველოში განსხვავებულ აზრს უჭირს სატელევიზიო ეთერში გაღწევა” და “მიუხედავად იმისა, რომ ძირითადი სამიზნე აუდიტორია ინტერნეტში ზის, ტრადიციული ტელევიზია მაინც მნიშვნელოვანი არხია ინფორმაციის გავრცელებისთვის”. ვითომ 16 რიცხვში Gillian Tan-მა არ გამოაცხადა ყველას გასაგონად, რომ სინგაპურში პროვოკაციული გადაცემები ტელევიზიაში რომ არ არის მიღებული, ამიტომაც ინტერნეტ-ტელევიზია გავაკეთეთო. სამწუხაროა, რომ ჩვენში “ორგანიზაციული წუწუნი” გახდა საქმის კეთების შემადგენელი ნაწილი.

დღე დააგვირგვინა MyVideo.ge-ს “ქეისის განხილვამ”. ნუ ქეისი კი არა success story გამოვიდა, მაგრამ ეს პრეზენტაცია მაშინ დავაფასე, როცა ბრიტანელებმა რამდენიმე ფაქტის მოსმენის შემდეგ ერთმანეთს გადახედეს და შეეტყოთ, რომ “რაღაც ახალი გაიგეს”. აქვე ვიტყვი, რომ MyVideo-მ გააჟღერა გეგმა, რომლის მიხედვითაც მალე “ვიდეო ბლოგინგის განვითარების მიზნით ამუშავდება Live Streaming-ის არხები ბლოგერებისთვის”. რეალობაში რა იქნება არ ვიცი, მაგრამ მოსასმენად კარგია…

ბოლოს მინდა პოზიტივით დავასრულო: კონფერენციაზე შეძენილი უცხოური ნაცნობობა მალე საინტერესო სერვისის განხორციელებაში დამეხმარება. Keep in touch

მსგავსი პოსტები

iTV Conference

David — Sat, 17 Apr 2010 16:27:30 +0000

ვიწყებ წინა პოსტში ნახსენები “სოციალური” კვირეულის ღონისძიებების აღწერას. რადგან წინა ღონისძიებების აღწერა ცოტა დამაგვიანდა, დავიწყებ უახლესით და შემდეგ მივყვები რიგით უფრო ძველებს:

iTV Conference

გუშინ გაიმართა iTV კონფერენცია. უფრო სწორად – მისი პირველი დღე. თუმცა, მეორე ნაწილი შორეულ 29 აპრილს არის დაგეგმილი. თუ გავითვალისწინებთ, რომ მეორე დღის თემატიკაც უფრო ტექნოლოგიებზეა ორიენტირებული, ვფიქრობ უფრო სწორი იქნება 2 დამოუკიდებელ კონფერენციად ჩავთვალოთ.

კონფერენციის პირველი დღის შინაარსზე ბევრი პოსტი დაიწერა. მოგვიანებით მეც ვიტყვი რამდენიმე სიტყვას. მანამდე კი მინდა მოგიყვეთ იმ დეტალზე, რაც ალბათ ყველა ღონისძიებაზე დასწრებისას პირველი გხვდებათ თვალში. ვგულისხმობ შეფუთვას.

რეგისტრაციის გავლის შემდეგ ყველა მონაწილეს გადმოგვეცა პარკი (როგორც შემდეგ აღმოჩნდა – გაზეთ Financial-ის რეალური ნომრებიდან გაკეთებული):

iTV Bag

რასაკვირველია, ვიღას ახსოვდა კონფერენცია – იმავე წამს პარკის შიგთავსის დათვალიერებას შევუდექი

იქ დამხვდა დღის განრიგი. სტამბურად დაბეჭდილი:

iTV Schedule

ბლოკნოტი. სურათზე ბევრად უარესად გამოიყურება, ვიდრე ცხოვრებაში:

iTV Notebook

დისკი. როგორც აღმოჩნდა, ყველა გამომსვლელის პრეზენტაციით:

iTV Disc

გარდა ამისა, პაკეტში იყო კალამი და მაისური, რომლის ზომაც საიტზე რეგისტრაციის დროსვე შეგეძლო აგერჩია. მე არსებულთაგან ყველაზე დიდი ზომა – XXL მქონდა მონიშნული. ეს ზომა დამხვდა პაკეტშიც… მაგრამ, როგორც ჩანს ამ მწარმოებლის განზომილებით მე XXXXL მჭირდება. მოკლედ, მაისური მუდმივად შემახსენებს დიეტის აუცილებლობას

ამ ნაწილის შესაჯამებლად ვიტყვი, რომ შეფუთვა იყო სასიამოვნოდ მაღალ დონეზე. რესფექთები ორგანიზატორებს.

პაკეტში ასევე იყო ჩემი სახელობითი ბეჯი:

iTV Badge

ორგანიზატორებმა საინტერესო მეთოდით გამოსახეს საკონტაქტო მონაცემები – ამისათვის მათ ორგანზომილებიანი შტრიხკოდი (2D barcode) გამოიყენეს. იგივე კოდი ჰქონდათ დატანილი სავიზიტო ბარათებზეც. თუ გავითვალისწინებთ, რომ ნებისმიერ ნოკიასაც კი შეუძლია ამ კოდის პირდაპირ წაკითხვა და მონაცემების სატელეფონო წიგნში შეტანა, ის დროა ყველამ დავიტანოთ ეს კოდი სავიზიტო ბარათებზე.

მთელი ამ იდილიიდან ამოვარდნილი იყო კონფერენციაზე რეგისტრაციის პროცესი (დასაწყისშივე არ ვახსენე, სიტკბო რომ არ გამეფუჭებინა). საიტზე რეგისტრაციის წარმატებით გავლის შემდეგ, შერჩეულ მონაწილეებს ელფოსტით მოგვივიდა აი ასეთი მოსაწვევი:

iTV Invitation

ეს მოსაწვევი ამობეჭდილი სახით უნდა მიგვეტანა კონფერენციის დღეს. ჩემი აზრით ეს ზედმეტი გართულებაა. მე პრინტერიან კომპთან იმ დღეს ვერ აღმოვჩნდი და მომიწია უბრალოდ კოდის კარნახი, რაც საკმარისი აღმოჩნდა. გმადლობთ. მაგრამ თუ ეს საკმარისია, რაღაზე აბეჭდინებთ სხვებს?! მოსაწვევზე ლაპარაკს რომ მოვრჩეთ, კიდევ ერთი შეკითხვა გამიჩნდა: თუ სხვა დოკებზე გამოყენებულია 2D კოდი, აქ რატომაა ჩვეულებრივი? Who cares, მაგრამ უბრალოდ საინტერესოა

ახლა გადავიდეთ საკუთრივ კონფერენციის შინაარსზე. სამწუხაროდ, ფოტოები არ გადამიღია, ამიტომ ეს ნაწილი თხრობითი იქნება.

დღის პირველი და ბოლო პრეზენტატორი იყო Gillian Tan – სინგაპურული ინტერნეტ-ტელევიზიის, ClickNetwork.TV-ის დირექტორი. მის ორივე პრეზენტაციას ეტყობოდა პროფესიონალიზმი. მის პრეზენტაციაში ლაპარაკი იყო ინტერნეტ-ტელევიზიის ზოგად ბიზნეს მოდელზე, მის ადგილზე ტელებაზარზე, სატელევიზიო მარკეტინგის სპეციფიკაზე, ახალი მედია ინტრუმენტების გამოყენებაზე და ა.შ.

დღის მეორე მოწვეული სტუმარი იყო სინგაპურელი ბლოგერი და ხსენებული ClickNetwork.TV-ის მონაწილე Wendy Cheng, იგივე Xiaxue. მისი ნიკი ჩინურად თოვლის ფანტელს თუ რაღაც ამდაგვარს ნიშნავს, მაგრამ დამსწრეთა უმრავლესობამ Xiaxue წაიკითხა როგორც Xaixui და… თოვლის ფანტელი ვიღას ახსოვდა როგორც ბლოგერი იგი უდაოდ ძალიან წარმატებულია, თანაც მთელს მსოფლიოში. როგორც პრეზენტატორი მე პირადად არ მომეწონა. შეიძლება ეს სპეციფიური აქცენტის ბრალია. შეიძლება იმის, რომ მისი პრეზენტაციის მოზრდილი ნაწილი YouTube-ზე დადებულ პრიკოლებს მიეძღვნა. თუმცა, იქ ჩემს გარდა მრავალი ისეთი იჯდა, ვისთვისაც Xiaxue ცოცხალი ლეგენდაა და სულ რომ ჩუმად მდგარიყო, მაინც მოახდენდა მის ეფექტს.

სხვა დეტალებზეც მინდა ვთქვა რამდენიმე სიტყვა:

კვების საკითხი იყო მართლაც მაღალ დონეზე მოგვარებული: დაგვხვდა სრულყოფილი სუფრა, 8-8 პერსონაზე გაწყობილი მაგიდებით.

თარჯიმნობას გვიწევდა ჩემი თანაინტელექტკლუბელი გიორგი ლაშხი და მისი კოლეგა ქალბატონი, რომელმაც ერთ-ერთი კლიპის თარგმნისას ისეთი სიტყვები წარმოშვა, რომ მისი იუმორის გრძნობა მთელმა დარბაზმა დააფასა!

მოკლედ, ძალიან კარგი დღე გამოდგა. დიდი რესფექტი ორგანიზატორებს. დიდი მოლოდინით ველი 29 რიცხვს და მეორე კონფერენციას!

მსგავსი პოსტები

ჩემი “სოციალური” კვირეული

David — Fri, 16 Apr 2010 07:05:22 +0000

ისე აეწყო, რომ 8 რიცხვის შემდეგ ერთი ღონისძიებიდან მეორეზე დავდივარ:

9-10 აპრილი – Social Innovation Camp
11-12 აპრილი – ვორკშოპი ახალი მედიის გამოყენების სტრატეგიებში
13 აპრილი – ტრენინგი ტრენერებისათვის ახალ მედიაში
14 აპრილი – იძულებითი შესვენება (ეკონომიკის სამინისტროში შეხვედრა გადაიდო)
15 აპრილი – შეხვედრა ეკონომიკის მინისტრთან საქართველოში ტურიზმისა და ბიზნესისათვის ახალი მედიის სტრატეგიის საკითხებზე
16 აპრილი – iTV კონფერენცია

ჰა, რავარია?

როცა ეს სოც. ღონისძიებები მორჩება, ვაპირებ თითოეულ მათგანზე პოსტის დადებას. იმედია ძალიან დაგვიანებული და აქტუალობა დაკარგული არ იქნება

Stay tuned.